Baku, 30 qershor, NOA – Për Shqipërinë paraqet një rëndësi mjaft të madhe njohja e saj si vend tranzit i kalimit të linjave të gazit dhe naftës nga Azerbajxhani.
Një fakt të tillë, kryetarja e Kuvendit Jozefina Topalli e ka theksuar gjatë takimeve të larta që zhvilloi në këtë vend të Lindjes së Mesme, konkretisht me kryeministrin dhe ministrin e zhvillimit Ekonomik.
Ajo kërkoi prej tyre angazhimin e drejtpërdrejtë në këtë çështje çka u prit shumë pozitivisht dhe u premtua se do të shfrytëzoheshin të gjitha mundësitë e potencialeve për të realizuar një dimension të ri të bashkëpunimit dypalësh.
Nga ana e tij, kryeministri Rasizadeh tha se e konsideron vizitën e kryeparlamentares shqiptare kontribut direkt për vendosjen e marrëdhënieve të bashkëpunimit ekonomik midis dy vendeve.
Ndërsa Topalli e siguroi se Shqipëria vlerëson progresin e shpejtë dhe strategjinë e zhvillimit ekonomik që ndjek Azerbajxhani si dhe rolin e tij në rajon.
Ajo theksoi se Shqipëria me pozitën e saj gjeopolitike, treguesit ekonomikë klimën atraktive për biznesin si dhe lehtësirat në këtë drejtim e bëjnë atë një partner të besueshëm dhe një treg interesant për investitorët e huaj.
Sektorë si energjia, infrastruktura, turizmi dhe bujqësia, u panë si inkurajuese për investime drejt Shqipërisë.
Ndërsa ministri i Zhvillimit Ekonomik, Shahin Mustafajev, shprehu gatishmërinë e tij për të konkretizuar me projekte bashkëpunimin ekonomik midis dy vendeve në shumë fusha me interes reciprok, kryesisht në fushën e energjisë.
n.e/NOA
