Lideri Kurd Oçalan I Kërkon Turqisë Dhe Pkk-Së Reflektim Mbi Një Armëpushim
ANKARA, 2 korrik /ATSH-AFP/ - Abdullah Oçalan, kreu i burgosur i Partisë së Punëtorëve të Kurdistanit (PKK), i ka kërkuar Ankarasë dhe lëvizjes së tij të armatosur të reflektojnë mbi një armëpushim të përkohshëm, ndërkohë që përballjet mes tyre janë shtuar shumë javët e fundit, njoftoi sot agjencia prokurde e lajmeve Firat.
"Të dyja palët mund të avancojnë drejt një procesi jo të dhunshëm", deklaroi lideri kurd i cili drejton 'PKK'-në nga qelia e burgut ku ndodhet dhe i përcjell mesazhet e tij përmes ndërmjetësimit të avokatëve të tij.
''Nëse një vullnet e tillë bëhet publik (...) lëvizja mund t'i përgjigjet", sipas agjencisë.
Oçalan, i burgosur që prej vitit 1999 në veriperëndim të Turqisë, deklaroi se populli kurd gjithashtu dëshiron "ndaljen e dhunës dhe armiqësive", fakt që përcillet edhe përmes kërkesave të bëra kohët e fundit nga Organizatat Joqeveritare kurde.
Lëvizja PKK i është drejtuar armëve për pavarësinë e rajoneve kurde dhe ky konflikt dhe përballja me ushtrinë turke deri tani ka shkaktuar 45 mijë të vdekur, sipas shifrave zyrtare./
/i.p/
