Shoqata Për Autonomi Vendore E Opozites I Kërkon Presidentit Mosdekretim Të Ligjit "Për Inspektimin Financiar"
TIRANË, 2 Korrik/ATSH/.- Shoqata për Autonomi Vendore, që përfaqëson rreth 100 bashki e komuna të drejtuara nga opozita, i bëri sot thirrje Presidentit të Republikës që të mos e dekretojë ligjin "Për Inspektimin Financiar Publik", pasi është antikushtetues.
Drejtori Ekzekutiv i kësaj Shoqate, Bledar Çuçi, reagoi ndaj miratimit dje në Kuvend të ligjit "Për Inspektimin Financiar Publik", duke e konsideruar një sulm të drejtpërdrejtë ndaj autonomisë vendore dhe të drejtës së bashkive e komunave për menaxhimin e burimeve të tyre financiare.
Sipas kryetarit Çuçi, ligji i pakonsultuar me grupet e interesit shkel hapur Kushtetutën shqiptare dhe Kartën Europiane për Vetëqeverisjen Vendore.
"Ligji i jep të drejtën një strukture në varësinë e Ministrit të Financave të inspektojë në çdo kohë fondet publike të qeverive vendore, duke përfshirë fonde, që sipas ligjit për buxhetin e shtetit, janë nën administrimin e plotë të bashkive dhe komunave dhe i nënshtrohen vetëm kontrollit financiar nga Kontrolli i Lartë i Shtetit", thuhet në deklaratën e Shoqatës për Autonomi Vendore.
Ligji "Për inspektimin financiar publik" u miratua dje në Kuvend vetëm me 71 votat e maxhorancës. Projekti i qeverisë synon rritjen e efektivitetit dhe transparencës në menaxhimin e fondeve publike. Ai konsiderohet një hap i rëndësishëm në reformat e Qeverisë kundër korrupsionit dhe njëkohësisht plotëson detyrimet që rrjedhin nga dokumentet strategjike të proceseve integruese. /a.s//n.m/
