Holandë - Të Hënën Konsultime Për Një Koalicion Qeverisës Me Katër Parti
BRUKSEL, 3 korrik /ATSH-ANSA/ - Pas dështimit të hipotezës për të formuar një qeveri ndërmjet liberalëve dhe të djathtës ekstreme të Geert Wilder, në Holandë po qarkullon një ide e re për një koalicion me katër parti, liberalët, laburistët, social-liberalët dhe të gjelbrit.
Konsultimet për të krijuar një qeveri të qendrës së majtë do të nisin ditën e hënë, njoftoi sot lideri i liberalëve, fituesi i zgjedhjeve të 9 qershorit, Mark Rutte.
Javën e kaluar kjo hipotezë ishte cilësuar si e pamundur nga vetë Rutte. Por u mor në konsideratë pas disa bisedimeve joformale me liderët e tre partive të tjera. Liberalët e Mark Rutte kanë fituar 31 vende në parlament, laburistët e ish-kryebashkiakut të Amsterdamit Job Cohen 30, demokristianët 21 dhe të gjelbrit 10 vende. Hipoteza për një koalicion me katër parti duket si një nga mundësitë e fundit që kanë mbetur për të krijuar një qeveri në Holandë.
/e.v/
