Kukës: Ndalohet Një Person, Transportonte Viça Kontrabandë
KUKËS, 3 korrik /ATSH-R.Hoxha/ - Një person që dyshohet se transportonte bagëti kontrabandë nga Kosova u arrestua natën e kaluar në afërsi të Kalimashit, rreth 14 km larg Kukësit.
Sipas Policisë, "Fatri Toçilla, 28 vjeç nga Tirana u ndalua ndërsa në makinë e tij me targa të Kosovës, 580 KS 56L, u gjetën 18 krerë viça që dyshohet se janë futur në Shqipëri kontrabandë".
Kontrabanda e bagëtive në kufirin Shqipëri-Kosovë vazhdon të mbetet një nga shqetësimet kryesore të forcave të policisë kufitare në qarkun e Kukësit.
Sipas policisë, në qershor u ndaluan 4 persona që transportonin drejt Shqipërisë 37 krerë viça. Nga hetimet rezulton se një pjesë e viçave të futur kontrabandë në tregun shqiptar janë të racës serbe, gjë që ka shtuar dyshimin se kontrabanda e tyre funksionon në linjën Serbi-Kosovë-Shqipëri./ch/
