Sarandë: Sipa Tours, Lundrim Me Jaht Në Gjithë Portet E Jonit
SARANDË, 3 Korrik /ATSH-Telnis Skuqi/ - Për herë të parë një kompani turistike ofron udhëtime me anije-çarter, duke ofruar guida 10-ditore me program të veçantë nga Marina e Vlorës tek gjithë portet e Jonit.
Arben Çipa, administrator i "Sipa Tours", thotë se kërkesat po vijnë duke u rritur. Sipas tij, prenotimet e para janë bërë që në qershor dhe vijojnë për çdo lloj prenotimi; akomodim, lundrim dhe për pushime për 16 persona e për grupe dhe më të mëdha.
Në ankorim, në anijen-çarter mund të organizohen festa për deri në 50 persona. Në muajt e vjeshtës do të ketë lëvizje me çarter, duke organizuar në to koktejle të ndryshme si dhe në periudhën e dimrit ku do ketë lëvizje në të gjithë bregdetin e jugut.
"Me liberalizimin e vizave kuptohet që lekët do të ikin jashtë Shqipërisë dhe nëse shërbimi është më i mirë se në Greqi apo gjetkë, ata do shkojnë atje për herë të dytë e të tretë, ndaj duhet profesionalizëm në shërbimet tona," thotë Çipa./ch/
