Prishtinë - Admirali Stavridis Thekson Përkushtimin E Nato-S Për Sigurinë E Stabilitetin E Kosovës Dhe Gjithë Rajonit
PRISHTINË, 5 Korrik /ATSH-B.Jashari/.- Komandanti Suprem i Forcave të Përbashkëta për Evropën (SACEUR), Admirali James G. Stavridis, në një takim sot në Prishtinë me Kryeministrin Hashim Thaçi, theksoi përkushtimin e NATO-s për sigurinë dhe stabilitetin e Kosovës dhe të gjithë rajonit.
Në një komunikatë të zyrës së shtypit të Qeverisë së Kosovës bëhet e ditur se Kryeministri Thaçi shprehu mirënjohjen për kontributin substancial që ka dhënë Aleanca Veriatlantike e NATO-në në ngritjen dhe fuqizimin e Forcës së Sigurisë të Kosovës, e cila është duke u zhvilluar gjithnjë e më shumë sipas standardeve më të larta të NATO-s.
Gjendja e sigurisë në Kosovë nga dy bashkëbiseduesit u vlerësua përgjithësisht stabile. Në këtë kuadër, Kryeministri Thaçi vlerësoi rolin e KFOR-it në ruajtjen e paqes dhe stabilitetit në Kosovë.
"Reduktimi i trupave të KFOR-it në Kosovë dëshmon se gjendja e sigurisë çdo ditë e më tepër është stabile dhe se institucionet e Kosovës janë të gatshme të marrin përgjegjësitë që iu takojnë për sigurinë e vendit", u shpreh Thaçi.
Gjatë takimit me Admiralin Stavridis Kryeministri Thaçi u shpreh për thellimin e mëtejshëm të bashkëpunimit të shkëlqyer me NATO-n në funksion të paqes dhe sigurisë në rajon./s.s./
