Durres: Maturantet, Ceremoni Festive Lamtumire Ne Shkollat E Mesme
DURRES, 6 korrik /ATSH-Gëzim Kabashi/. - Në shkollat e mesme të Durrësit kanë nisur ceremonitë festive të "lamtumirës" për më shumë se 2200 maturantë, që përfunduan ciklin mësimor 12-vjeçar.
Mira Bllani, drejtore e Drejtorisë Arsimore rajonale (DAR), tha për ATSH-në se ceremonitë do të zhvillohen në 15 shkollat e mesme publike dhe në 10 shkolla jopublike në të gjithë rrethin, duke u kthyer në një traditë të bukur të përvitshme jo vetëm për maturantët, por edhe për prindët dhe mësuesit e tyre.
Mbrëmjen e kaluar ceremonitë festive u zhvilluan në shkollat e mesme "Rilindja" dhe "Hysen Çela", ku bashkë me ndarjen e çertifikatave për nxënësit e shkëlqyer, u duartrokitën dhe fjalimet e këndëshme të disa të sapodiplomuar me dëftesën e pjekurisë.
Notat nostalgjike për jetën shkollore dhe vlerësimet për mësuesit, prindët dhe shokët e klasës, përshkuan fjalën e nxënësve 18-vjeçarë Xhenina Pashaj, Katerina Kordha dhe Iris Bylykbashi, ndërsa nuk munguan edhe notat humoristike në fjalën e Enio Likmetës apo Fiora Baballëkut. Besimi për të ardhmen ishte pjesë e fjalës së drejtorit Drini Hasani dhe mësuesve të shkollës, të cilët u uruan maturantëve suksese në studimet e larta.
Falenderimet për mësuesit u pasuan me shpërndarjen e dëftesave të pjekurisë dhe nënshkrimi në Librin e madh të shkollës "Rilindja". Më pas, maturantët valëvitën në ajër kapelat-simbol të lamtumirës së shkollës së mesme. /a.ke/
