Meta: Ps Të Bëhet Pjesë E Reformës Zgjedhore
TIRANE, 6 Korrik / ATSH- A.Gegvataj/ - "Nuk mund të zgjidhet transparenca më mirë se sa me përmirësime ligjore dhe ne besojmë që opozita nuk do të vazhdojë më me pretekste për të shmangur reformimin e sistemit zgjedhor", deklaroi sot Kryetari i LSI-së, Ilir Meta, gjatë mbledhjes së kryesisë së kësaj partie.
Meta kërkoi që "të gjithë ata që vërtet e kanë të sinqertë kërkesën dhe synimin për transparencë të bashkohen me përpjekjet tona për ta reformuar me tej sistemin zgjedhor".
Sipas tij, "pavarësisht nga vlerësimi i lartë që i bëri komuniteti ndërkombëtar zgjedhjeve të 28 qershorit, përsëri ato kishin problemet e tyre, ashtu sikurse dhe vetë kodi konsensual PS-PD nuk ishin prefekt".
"Një listë më rekomandime nga OSBE/ODIHR prej gati një viti është publike dhe i fton të gjitha forcat politike për t'i shndërruar ato në amendamente", tha Meta, duke shtuar se "besoj se në radhë të parë kjo listë rekomandimesh fton PS-në për të bashkëpunuar, si forcën kryesore opozitare në vënd, e cila ka ngritur pas zgjedhjeve edhe shqetësime më shumë për çështjen e transparencës"./s.s./
