Moska: Presim Një Rinisje Të Shpejtë Të Bisedimeve Gjashtëpalëshe Me Iranin
MOSKË, 6 korrik /ATSH-AFP/ - Rusia pret një rifillim të shpejtë të negociatave mes fuqive të mëdha dhe Iranit lidhur me programin e shumëpërfolur bërthamor, u shpreh sot zëvendësministri i Jashtëm rus, ndërkohë që Teherani i ka pezulluar deri në fund të gushtit bisedime të tilla.
"Presim që një takim i ri mes shefes së BE-së për diplomacinë, Catherine Ashton dhe të krerëve politikë të grupit të ''Të Gjashtëve'' me partnerët iranianë të zhvillohet sa më parë të jetë e mundur", deklaroi Serguei Riabkov, i cili citohej nga Interfax.
"Kemi të qartë se vonesa e paraqitur nga iranianët është e dyta deri në gusht dhe nga ana e të Gjashtëve, ku përfshihet Kina, SHBA-ja, Franca, Britania e Madhe, Rusia dhe Gjermania, nuk besoj të ketë kundërshtime për organizimin e shpejtë të një takimi", theksoi ai./
/i.p/
