Presidenti I Ke, Rompuy: Sundimi I Ligjit Njëri Ndër Prioritetet Tona Më Të Rëndësishme Në Kosovë
PRISHTINË, 6 Korrik /ATSH-B.Jashari/.- Sundimi i ligjit është njëri nga prioritetet tona më të rëndësishme në Kosovë, tha sot në Prishtinë, Presidenti i Këshillit Evropian, Herman Van Rompuy.
Në një njoftim të EULEX bëhet e ditur se përveç takimit me autoritetet më të larta të Kosovës, Presidentin Fatmir Sejdiun, Kryetarin e Kuvendit, Jakup Krasniqin dhe Kryeministrin Hashim Thaçi, presidenti Rompuy u takua me Përfaqësuesin Special të BE-së, Pieter Feith dhe vizitoi selinë kryesore të EULEX-it, ku u prit nga zëvendës Shefi i Misionit, Roy Reeve.
Në komentet e tij pas vizitës në EULEX, Presidenti Rompuy filimisht shprehu falënderimin dhe përkrahjen për punën e EULEX-it dhe atë të institucioneve të tjera të BE-së të pranishme në Kosovë.
"Misioni EULEX është misioni më i madh civil i BE-së, i ndërmarrë ndonjëherë. Puna e tij, së bashku me veprimtaritë e Përfaqësuesit Special të BE-së, si dhe puna e Zyrës Ndërlidhëse të Komisionit Evropian në kuadër të agjendës për reforma, është e rëndësishme për zhvillimin e Kosovës dhe të aspiratave evropiane të saj", tha ai.
Presidenti Rampuy vuri në dukje se "sundimi i ligjit është një nga vlerat përcaktuese të Bashkimit Evropian, dhe njëri nga prioritetet tona më të rëndësishme në Kosovë".
Ai shtoi se "misioni i EULEX-it ka arritur rezultate të mira. Aktivitetet e tij pasqyrojnë përkushtimin e fuqishëm të BE-së për ta luftuar krimin e organizuar dhe korrupsionin".
"27 vendet anëtarë të BE-së i kanë dhënë përkrahjen e tyre të plotë punës së EULEX-it", theksoi Rompuy.
/s.s./
