Sport-Botëror/ Kupa E Botës 2010 E Pastër Nga Substancat E Ndaluara
TIRANË, 6 Korrik /ATSH - Gjergji Mima/ - Teksa janë zhvilluar 48 ndeshje në grupe dhe 12 në raundin e dytë të Kupës së Botës "Afrika e Jugut 2010", FIFA ka realizuar 240 teste antidoping dhe të gjitha kanë rezultuar negative. Analizat e kryera të urinës dhe gjakut kanë treguar se asnjë lojtar nuk ka përdorur substanca të ndaluara.
Testet kanë nisur që në prag të Kampionatit Botëror të Futbollit dhe siç bën të ditur FIFA, në 256 teste që u realizuan gjithsej, sërish nuk janë zbuluar shkelje.
Analizat janë bërë edhe në kampet stërvitore në Europë dhe në Afrikë të Jugut, ndërsa janë shqyrtuar në Agjencinë Antidoping në Bloemfontein. /a.ke/
