Tiranë, 7 Korrik, NOA – Shqipëria ka realizuar progres në procesin e integrimit europian dhe ka shënuar arritje domethënëse në luftë kundër krimit të organizuar, korrupsionit dhe trafikimit të qenieve njerëzore.
Një fakt të tillë ministrit të Brendshëm, Lulëzim Basha, ia ka komunikuar gjatë një takimi zv/presidentja e fondacionit Hanns-Seidel, njëherësh parlamentare bavareze, Ursula Mannle dhe drejtuesit më të lartë të policisë bavareze, gjatë një takimi të përbashkët.
“Arritjet në luftën kundër krimit, korrupsionit e trafiqeve dhe progresi i Shqipërisë në rrugën e integrimit përbëjnë një bazë solide për forcimin e sigurisë, zhvillimin e vendit dhe mirëqenien e qytetarëve shqiptarë”, - u shpreh në takim parlamentarja bavareze Mannle.
Ndërkohë, presidenti i policisë së Bavarisë, Valdemar Kindler dhe drejtori i Policisë Kriminale, Klaus Bayerl vlerësuan nivelin e lartë të bashkëpunimit me policinë shqiptare, të konkretizuar edhe me operacione të përbashkëta policore.
Fondacioni Hanns-Seidel vepron në Shqipëri që prej vitit 1992 duke realizuar projekte bashkëpunimi mes Shqipërisë dhe Gjermanisë për mbështetjen e administratës vendore dhe procesit të decentralizimit të qeverisjes vendore, për mbështetjen e strukturave të shtetit ligjor e në mënyrë të veçantë për bashkëpunimin policor mes të dy vendeve.
Nga ana e tij, ministri Basha e cilësoi shembullor bashkëpunimin e deritanishëm me autoritetet policore gjermane si dhe shprehu falënderimin për ndihmën e dhënë nga Fondacioni Hanns-Seidel në drejtim të policisë shqiptare.
n.e/NOA
