Topalli Zgjidhet Zv/Presidente E Unionit Ndërparlamentar Botëror
TIRANË, 7 Korrik/ATSH/.- Kryetarja e Kuvendit të Shqipërisë, Jozefina Topalli është zgjedhur zv/Presidente e Unionit Ndërparlamentar Botëror (IPU), mes 155 kryetarëve të parlamenteve të të gjithë vendeve të Botës, anëtare të IPU-së.
Sipas burimeve zyrtare nga Kuvendi, IPU-ja është një ndër organizmat më të rëndësishme të politikës botërore, i cili ka në fokus dialogun ndërparlamentar dhe bashkërendimin e axhendave në përballimin e sfidave me interes global, si dhe mbrojtjen e të drejtave të njeriut.
Në cilësinë e zv/Presidentes, Topalli është ftuar nga Presidenti i IPU-së, Dr. Theo-Ben Gurirab, në Konferencën e III-të botërore të kryeparlamentarëve, një samit global i fokusuar në rolin thelbësor të institucioneve legjislative në politikën botërore dhe në marrëdhënien e tyre me Organizatën e Kombeve të Bashkuara, takim që do të mbahet nga 19-21 korrik në qendrën e IPU-së, në zyrat e Kombeve të Bashkuara në Gjenevë.
Tema qendore e këtij evenimenti politik është "Parlamentet në një kohë krize botërore; sigurimi i një demokracie globale për të mirën e përbashkët", ku Topalli do të mbajë një fjalim mbi "Forcimin e besueshmërisë politike mes parlamentit dhe qytetarëve".
Para këtij takimi Topalli do të marrë pjesë dhe në Konferencën e VI vjetore të grave kryeparlamentare që do të mbahet në Bernë, në datat 16-17 korrik 2010 dhe që organizohet nën kujdesin e Presidentit të IPU dhe Parlamentit të Zvicrës.
Takim vjetor i grave do të fokusohet, jo vetëm në sfidat për arritjen e barazisë gjinore , por në veçanti në arritjen e Objektivave të Mijëvjeçarit për kujdesin ndaj foshnjave dhe nënave.
Konferenca pritet të kontribuojë edhe në përgatitjet e takimit mbi rishikimn e Objektivave të Mijëvjeçarit, që do të mbahet në shtator në Selinë e Kombeve të Bashkuara në New York.
/a.s/
