Lsi: Ps Braktisi Parlamentin Dhe La Në Baltë Sokol Çomon
TIRANË, 8 Korrik/ATSH-Maela Marini/.- "Partia Socialiste braktisi parlamentin, duke lënë në baltë Sokol Çomon", thuhet në një deklaratë të Lëvizjes Socialiste për Integrim, 4 deputetët e së cilës votuan sot, në Kuvend, pro kandidaturës të Sokol Çomos për anëtar të Gjykatës së Lartë.
"Nëse do të ishin të pranishëm në votim deputetët e PS-së dhe nëse do ta votonin kandidaturën e Sokol Çomos, ai do të zgjidhej anëtar i Gjykatës së Lartë. 64 deputetë të PD votuan kundës Sokol Çomos. Atij i munguan 65 votat e deputetëve socialiste. Ndërsa 4 deputetët e LSI-së votuan pro tij", thuhet në deklaratën për shtyp.
Gjithashtu, në këtë deklaratë LSI sqaroi se "voton në respekt të zgjedhjes së bërë nga Presidenti i Republikës, Bamir Topi".
Kuvendi miratoi sot me 71 vota dhënien e pëlqimit ndaj kandidaturës të Medi Bicit për anëtar te Gjykatës së Lartë, ndërsa rrëzoi me 64 vota kandidaturën e Sokol Çomos.
Deputetët socialistë u larguan nga seanca plenare, ndërsa konform rregullores së Kuvendit, deputetët e maxhorancës votuan nominalisht në mënyrë të hapur dekretet presidenciale për emërimin e anëtarëve të Gjykatës së Lartë./s.s./
