Tiranë, 9 korrik, NOA – Pas deklarimeve të Edi Ramës, se votimi pro i LSI-së, ndaj Sokol Çomos, ishte votim fals, ka reaguar edhe nënkryetari i LSI-së, Petrit Vasili, i cili duke e quajtur Edi Ramën , hipokrit”, deklaroi se përpara se Rama të shpifë për votë fals duhet t’i kërkojë falje publikisht grupit të tij të deputetëve, por edhe komunitetit të gjerë të profesionistëve, për vendimin e qartë të LSI-së, për të refuzuar rreshtimin me PD-në, qëndrim të cilin LSI ua kishte bërë të qartë jo vetëm kandidatëve, por edhe deputetëve të PS, duke mos pasur surprizë në asnjë rast”.
Nënkryetari i LSI-së, Vasili theksoi se “qëllimi i vetëm i Edi Ramës, ishte që të krijojë në mënyrë të vazhdueshme alibi të pafundme për të justifikuar një politikë destruktive në mënyrë të vazhdueshme, me qëllim që të arrijë shtyrjen e ëndërruar të zgjedhjeve lokale me synimin e lexueshëm qartë, për të shtyrë ca ditë më shumë në karrigen shumë të rëndë nga korrupsioni të Bashkisë së Tiranës”.
Sipas Vasilit, është pikërisht korrupsioni i Ramës, në bashkinë që ai e drejton prej 10 vitesh, që i ka mbyllur dyert të gjithë hetimeve dhe auditimeve të mundshme, pasi rreket të sigurojë përfitime të reja, që fillojnë nga lejet e ndërtimit tek gjobat gjithfarëshe, që ushtrojnë specialistët e korruptuar të tij në kryeqytet.
Duke iu referuar daljes së sotme të Ramës për të përshëndetur rezolutën e PE-së, nënkryetari i LSI-së, tha se “Njëkohësisht është vendi për t’i kujtuar sërish demagogut hipokrit Edi Rama, që në vend që t’i përgjigjet rezolutës shumë të qartë të djeshme që vjen nga Evropa, i konsideron siç e vutë re dhe ju si histori me ulje dhe ngritje koke, histori kalamajsh, çiliminjsh dhe fëmijësh kapriçoz, të papërgjegjshmit, të cilit politika i ka lënë e po i lë gjithmonë e më shumë pas, duke u përpjekur të nëpërkëmbë ligjet e këtij vendi”.
Vasili shtoi ndër të tjera se “Shqipëria e votuar në rezolutën e PE-së, është ajo e shtetit ligjor, është Shqipëria e nenit 178, të propozuar e miratuar nga Edi Rama vetë, të cilit ai duhet t’i bindet si gjithë të tjerët, e që nuk do të ketë asnjë hezitim për ta zbatuar atë dhe mbi të nuk del dot as kryetari dritëhije dhe i çuditur e i habitur i Bashkisë së Tiranës, por edhe askush tjetër në këtë vend”.
Sipas Vasilit gabimi më i rëndë i Ramës është se po përpiqet të luajë e të shpërdorojë vëmendjen e ndërkombëtarëve, një gabim i pafalshëm për të dhe pozicionin politik që ai mban, një histori, që sipas nënkryatrit të LSI-së, “bie mbi kurrizin e Edi Ramës, sikundër ishte edhe refuzimi i hapur dhe publik për të votuar gjyqtarin Çomo dje, e deri tek anashkalimi, përbuzja dhe mosbindja ndaj një rezolute shumë të qartë dhe konkrete, e cila shpreh në mënyrë të qartë edhe vullnetin e duhur të mazhorancës dhe LSI-së për hullitë kushtetuese ku duhet të ecë zgjidhja e ngërçit politik në Shqipëri”.
mit/NOA
