Bullgari - Ish-Kryeministri Stanishev Akuzohet Për Zhdukje Dokumentesh Të Rëndësishme

E SOFJE, 14 korrik /ATSH-MIA/ - Prokuroria bullgare sot ngriti akuzë kundër ish-kryeministrit bullgar, Sergei Stanishev për zhdukje të shtatë raporteve të besueshme gjatë mandatit të tij. "Zyra e Prokurorisë në Sofje ngriti akuzë kundër Sergei Stanishevit për shkak të zhdukjes së shtatë dokumenteve", thuhet në njoftimin e prokurorisë. Në të shtohet se nga dokumentet e zhdukura, tre janë përgatitur nga Agjencia Kombëtare për Sigurinë, dy nga Ministria e Punëve të Brendshme dhe nga një nga Ministria e Mbrojtjes dhe NATO-ja. Prokuroria refuzoi të bëjë të ditur se çfarë mendon se ka ndodhur me dokumentet e zhdukura si dhe të zbulojë më shumë hollësi për përmbajtjen e tyre, që paraqet sekret shtetëror. Stanishev, i cili ishte kryeministër i Bullgarisë gjatë viteve 2005-10, ndërsa tani është lider i Partisë Socialiste në opozitë, i përshkruajti akuzat si politikisht të motivuara. "Nuk ka dyshim se organet hetimore dhe prokuroria punojnë nën presionin e pushtetit ekzekutiv. Ata zbatojnë urdhërat e tyre politike", deklaroi Stanishev. Kryeministri Bojko Borisov, i cili pasoi Stanishevin, deklaroi se dokumentet e zhdukura përmbajnë hollësi për krimin dhe korrupsionin në vend. Borisov deklaroi tetorin e kaluar se të paktën nëntë raporte të besueshme për krimin, korrupsionin, kontrabandën dhe përforcimin e ndikimit energjetik të Rusisë janë zhdukur nga zyrat e qeverisë gjatë mandatit të paraardhësit të tij. Nëse gjykata konfirmon akuzën, Stanishev do të dënohet me dy vjet burg ose me gjobë./ a.jor.