Durrës: Bashkëpunimi, Mbi 100 Gra Dhe Vajza Të Dhunuara Nën Mbrojtjen E Shtetit
DURRËS, 14 korrik /ATSH-Gëzim Kabashi/.- Pas denoncimit për dhunimin fizik dhe psikologjik, mbi 100 gra dhe vajza në qytetin e Durrësit, janë vënë nën mbrojtjen e shtetit.
Burime zyrtare nga drejtoria e Policisë së Qarkut bënë të ditur të mërkurën për ATSH-në se, vetëm në Durrës, nga Gjykata e Shkallës së Parë, janë regjistruar 67 vendime për mbrojtje të mënjëhershme dhe nga 17 të tjerë përkatësisht në zonat e Shijakut dhe Krujës.
Bashkëpunimi me Qendrën "Sot për të Ardhmen" dhe me specialistet e Zyrës për Barazinë Gjinore në bashkinë e Durrësit, kanë lehtësuar gjendjen psikologjike të grave të dhunuara më së shumti nga bashkëshortët e tyre.
Sipas burimeve të policisë së Durrësit, në 9 raste, gratë e vëna nën mbrojtjen e shtetit janë akomoduar pranë një shoqate të specializuar në qytetin e Elbasanit.
Raste të dhunës ka patur brenda familjes, ndaj nënave apo motrave, shumë prej të cilave më parë mbaheshin të fshehura për shkak të mungesës së ligjit apo zbatimit të tij./m.sh//a.ke/
