Durrës, 14 Korrik, NOA – Në parkingun e një hoteli, dy persona janë zënë me njëri-tjetrin orëve të vona të natës duke përfunduar deri në krisje armësh, nga të cilat ka mbetur i plagosur rëndë njëri prej tyre.
Ngjarja e rëndë raportohet për agjencinë e Lajmeve NOA nga burimet policore të Durrësit, sipas të cilave ajo ka ndodhur konkretisht në mjediset e hotel “Canal Grande”, pas një konflikti për motive të dobëta mes 42-vjeçarit Aleksandër Mustaka dhe 18-vjeçarit me inicialet O.B., banues në Vlorë.
I pari mësohet se është agresori, ndërsa i dyti ka pësuar prej tij dëmtime në këmbën e majtë përmes plumbave të një pistolete, por për fat të mirë ai ndodhet aktualisht i shtruar në spitalin e Durrësit, jashtë rrezikut për jetën.
Pas ngjarjes, autori i dyshuar i saj, Aleksandër Mustaka është larguar me qëllim shmangien nga hetimi, por nga ana e policisë, po vazhdon puna për kapjen e tij. Ndërkaq, materialet proceduriale për veprat penale të “Plagosjes së lehtë me dashje” dhe “Mbajtjes pa leje të armëve e municioneve luftarake”, iu kaluan për ndjekje prokurorisë së Durrësit.
n.e/NOA
