Tiranë, 14 Korrik, NOA – Me anë të një vendimi të posaçëm, të marrë në mbledhjen e sotme, qeveria ka përcaktuar rregullat dhe procedurat e sesi përmbarimi do bashkëpunojë me agjencinë e administrimit të pasurive të sekuestruara dhe të konfiskuara.
Kështu, vendimi së pari parashikon faktin që administratori, i caktuar në vendimin e gjykatës, i dorëzon kërkesën për ekzekutimin e vendimit përmbaruesit ku ndodhet pasuria që sekuestrohet.
Vendimi i gjykatës për sekuestrimin e pasurive, parashikohet që të vihet në ekzekutim menjëherë, me paraqitjen e kërkesës dhe duhet të ekzekutohet brenda 5 ditëve.
Ndërkaq, inventarizimi dhe dorëzimi i pasurive të sekuestruara, nga përmbaruesi gjyqësor te administratori, dokumentohet me procesverbal, sipas nenit 524 të Kodit të Procedurës Civile.
Ndër të tjera, vendimi përcakton se administratori i pasurisë ia dorëzon kërkesën për ekzekutimin e vendimit të konfiskimit përmbaruesit gjyqësor, të caktuar në vendimin e gjykatës dhe se përmbaruesi urdhëron institucionet përgjegjëse për kalimin e pasurisë në pronësi të shtetit dhe në administrim të Agjencisë së Administrimit të Pasurive të Sekuestruara dhe të Konfiskuara, menjëherë pas marrjes së njoftimit të vendimit të konfiskimit.
n.e/NOA
