Fier, 15 Korrik, NOA – Kishte një listë të gjatë me detyrime të papaguara për energjinë elektrike dhe për t’i shlyer ato, preferoi që t’i paguante më mirë 1 milionë lekë punonjësit elektrik të OSSH-së që ia kishte vënë ato në formë gjobe për ndërprerjen e energjisë elektrike.
Bëhet fjalë për personin me inicialet I.B. i cili i ka paguar këto para dhe 53-vjeçarin Vangjel Behari, me punë përgjegjës i arkëtimeve pranë degës së OSSH-së në Fier.
Ky i fundit, siç raportojnë burimet policore të Fierit për agjencinë e Lajmeve NOA është vënë në pranga prej tyre në kuadrin e operacionit “Guximi”.
Mësohet se arrestimi i këtij personi u bë pas një pune disa ditore investiguese e operative nga ku u bë i mundur dokumentimi ligjor i veprimtarisë kriminale të “Korrupsionit pasiv ne sektorin privat”, parashikuar nga neni 164/b të Kodit Penal, kryer nga Vangjel Behari.
Materialet hetimore iu kaluan prokurorisë së Fierit për veprime të mëtejshme.
n.e/NOA
