Korçë, 15 Korrik, NOA – I doli garant një miku për të marrë kredi në bankë, por ai nuk po e paguan e në këtë rast banka po ia mban atij lekët.
Një gjë ë tillë duket se e ka mërzitur shumë njeriun që kujtoi se ishte gjë me vlerë t’i bëje nder një shoku, saqë ka denoncuar në polici rastin e tij.
Ngjarja mësohet se ka ndodhur në qytetin e Korçës dhe raportohet nga burimet policore të saj për agjencinë e Lajmeve NOA, duke saktësuar se denoncuesi i saj është 34-vjeçari me emrin E.Shishmani, banues i këtij qyteti.
Ai ka paraqitur para tyre ankesën se shoku i tij Erlin Dinellari, 34 vjeç, pasi ka marrë kredi nën garancinë e tij tek banka “Credins” nuk po e paguan atë dhe ndaj ai po detyrohet të paguajë në emër të tij.
Menjëherë forcat e policisë nisën kryerjen e veprimeve hetimore proceduriale në gjendje të lirë ndaj Dinellarit, për veprën penale të “Mashtrimit”, parashikuar nga neni 143/2 i Kodit Penal.
Ndërsa materialet për këtë ngjarje i kaluan prokurorisë për hetime të mëtejshme.
n.e/NOA
