Tiranë: Tregtarët E Njësisë Bashkiake Nr.3, Ankesa Për Taksat E Larta Të Bashkisë
TIRANA, 16 Korrik/ATSH - Gjergji Mima/ - Tregtarët e njësisë Bashkiake nr. 3 në Tiranë shprehën sot pakënaqësinë e tyre ndaj taksave të larta që Bashkia ka vënë ndaj tyre.
Në një prononcim për mediat sot, tregtarët thanë se "ne paguajmë rregullisht taksat lokale, tarifën e ambienteve në treg dhe rezultati është sikur të jesh në një treg mesjetar. Në realitet, taksat janë shumë të larta, por shërbimi që marrim është zero", është shqetësimi më i madh që ngrenë tregtarët e njësisë Bashkiake nr. 3.
Sipas tyre, "është krejtësisht e pa përgjegjshme dhe cinike të mos realizosh asnjë investim për të përmirësuar këtë gjendje skandaloze. Në këtë mënyrë vetëm sa përçmohet biznesi dhe vështirësohet jeta e banorëve".
Nga një vëzhgim i ATSH-së, konstatohet se e njëjta gjendje ekziston edhe në tregun tjeter, pak më larg, afër Spitalit të Neurologjisë.
Natyrshëm lindin pyetjet: ku shkojnë taksat e larta që paguhen nga tregtarët? Pse nuk vihet dorë për të rregulluar një gjendje të tillë? Përse këto të ardhura nuk përdoren për destinacionin e tyre normal?
Duke parë këtë gjendje, vihet re se ka një keqpërdorim të plotë të të ardhurave nga taksat e larta lokale, që paguhen nga qytetarët dhe biznesi për Bashkinë e Tiranës, si dhe një politikë centraliste ndaj njësive bashkiake nga Bashkia qëndrore, politikë kjo që krijon situata të rënduara për tregtarët dhe qytetarët kryeqytetit. /a.ke/
