Pll Mbështet Krijimin E Komisionit Parlamentar Për Masakrën E Tivarit
TIRANË, 17 Korrik/ ATSH/- Partia Lëvizja e Legalitetit (PLL) mbështeti sot krijimin e komisionit parlamentar për hetimin e masakrës së Tivarit.
Në një konferencë për shtyp, nënkryetari i PLL-së, Murat Basha u shpreh, se " ky është një veprim që duhet inkurajuar për zbardhjen e plotë jo vetëm të masakrës së Tivarit, por dhe të gjitha krimeve të tjera të ideuara dhe kryera nga kupola komuniste dhe veglat e saj".
Sipas tij, "dënimi i krimeve të komunizmit është domosdoshmëri e vazhdueshme që do ta ndihmojë shoqërinë shqiptare për t'u shkëputur një herë e mirë nga e kaluara tragjike dhe për ta bërë atë më të shëndetshme në proceset integruese të vendit".
Në seancën e fundit parlamentare, Kuvendi miratoi, vetëm me votat e maxhorancës, ngritjen e një komisioni hetimor që do të punojë për zbardhjen e së vërtetës së masakrës së Tivarit. Në këtë ngjarje, të ndodhur në vitin 1945, u vranë rreth 4500 persona./s.d/a.s/
