Aksidenti/Meta: Solidariteti I Qeverisë Nuk Do Ndalet
TIRANE, 18 Korrik./ATSH, A.Gegvataj /- "Qeveria shqiptare do t'i ofrojë të gjitha ndihmat e nevojshme familjeve të viktimave të aksidentit rrugor në Fushë Arrëz. Solidariteti i qeverisë nuk do ndalet deri këtu", tha sot Zv.kryeministri dhe ministri i Jashtëm Ilir Meta pasi vizitoi të plagosurit e aksidentit në Fushë Arrëz, të shtruar në Spitalin Ushtarak në kryeqytet.
Në një prononcim për mediat, i tronditur nga kjo tragjedi e rëndë që ka prekur gjithë opinionin publik, Meta vlerësoi solidaritetin e gjithë shqiptarëve në lidhje me këtë ngjarje si dhe punën e mirë të mjekëve të cilët po i japin ndihmën mjekësore të plagosurve.
"Shpresojmë që gjëndja e të plagosurve të vijë duke u përmirësuar, ndërsa jam i bindur që kjo ngjarje e rëndë me përkrahjen dhe solidaritetin që po tregon i gjithë opinioni, do të kalojë dhe do të gjendet mënyra për t'i ndihmuar të gjitha familjet ", nënvizoi shefi i diplomacisë shqiptare./n.m/
