Kosovë - Qeveria Përshëndet Suksesin E Zgjedhjeve Në Partesh
PRISHTINË, 19 Korrik /ATSH-B.Jashari/.- Qeveria e Kosovës përshëndeti sot mbajtjen me sukses të zgjedhjeve në komunën e re të Parteshit dhe uroi banorët e saj për fillimin e një kapitulli të ri të zhvillimit dhe prosperitetit.
Përmes një deklarate për shtyp, qeveria thekson se , "do të jetë fuqimisht e angazhuar për bashkëpunim të gjithanshëm me institucionet komunale të Parteshit, të zgjedhura nga vota e lirë e qytetarëve. Inkurajojmë udhëheqjen komunale të Parteshit që në përkushtimet për krijimin e kushteve sa më të mira për gjithë qytetarët, do ta ketë përkrahjen e vazhdueshme të Qeverisë së Republikës së Kosovës".
Parteshi, komuna e katërt e re e Kosovës, nga pesë komunat e reja me shumicë serbe të Paketës Ahtisaari, me balotazhin e djeshëm, përmbylli zgjedhjet e saj të para lokale.
Në tri komuna të reja, Graçanicë, Kllokot dhe Ranillug, ku zgjedhjet u mbajtën më 15 nëntor 2009, me kohë është bërë konstituimi i kuvendeve dhe qeverive lokale, ndërsa komuna e katër, Parteshi, do pasohet me të pestën, Mitrovicën e Veriut, ku është emëruar ekipi përgatitor komunal. Aty zgjedhjet pritet të zhvillohen në kuadër të Strategjisë Gjithpërfshirëse për Integrimin e Veriut./s.d//a.ke/
