Rusia Jep 50 Autoblinda Për Palestinezët
MOSKË, 20 korrik /ATSH-AFP/ - Rusia u dha palestinezëve 50 autoblinda për transportin e trupave në kuadrin e përpjekjeve të komunitetit ndërkombëtar për forcimin e institucioneve të Autoritetit palestinez, njoftoi sot Ministria e Jashtme ruse.
"Rusia i dha palës palestineze 50 autoblinda BTR-70, pa kërkuar asgjë në këmbim", thekson ministria në një komunikatë.
"Ceremonia zyrtare e transferimit të autoblindave u zhvillua më 19 korrik në Jordani ku autoblindat janë dërguar me rrugë detare. Specialistët rusë i kanë udhëzuar shoferët palestinezë si t'i drejtojnë këto automjete", vazhdoi i njëjti burim.
Autoblindat do të qëndrojnë në Jordani deri sa Izraeli dhe palestinezët të bien dakord lidhur me modalitetet e transferimit të tyre në Cisjordani, shtoi diplomacia ruse.
"Është e rëndësishme që kjo të bëhet menjëherë", këmbëngul ministria.
Izraeli ka kundërshtuar më parë transferimin e autoblindave ruse tek Autoriteti palestinez.
Rusia ka mbajtur marrëdhënie miqësore me palestinezët që prej epokës sovjetike.
/I.Pu.
