Tiranë, 20 korrik, NOA – I veshur me petkun e një kompanie private, arriti të mashtrojë biznese dhe tregtarë të ndryshëm, duke përfituar plot 70 milion lekë.
Bëhet fjalë për 28 vjeçarin Fatjon Shpëtim Podri, i cili u arrestua në flagrancë në orët e vona të së hënës.
Policia e Tiranës, bën të ditur se ndaj Fatjon Podri, janë depozituar disa kallzime penale nga disa shtetas të dëmtuar, pasi dyshohet se 28 vjeçari Fatjon Podri mashtronte duke u prezantuar si administrator i një Kompanie Private.
Ai ka mbërritur të mashtrojë tregtarë të subjekteve të ndryshme në Tiranë (si kambistë, Exchange).
Gjatë këtyre mashtrimeve të konsumuara në periudha të ndryshme, për përfitim parash, Fatjon Podri, thekson policia, kish mundur të bëntë mbi vete një shumë të konsiderueshme, që deri tani kur ai u kap në flagrancë, shkon në 70 milion lekë.
Sipas policisë, Fatjon Podri u merrte para borxh tregtarëve të ndryshëm, duke iu premtuar dhe interesin e parave të marra borxh, ku fillimisht është treguar korrekt në kthimin e parave bashkë me interesin, me qëllim që t’i mashtronte më pas.
Nga hetimet e deritanishme, ka rezultuar se 28 vjeçari Podri e ka ushtruar këtë aktivitet të paligjshëm, përreth 1 vit e gjysmë, duke përfituar dorazi shumën e parave të lartpërmendur, prej 70 milion lekësh.
Aktualisht, oficerët e krimit ekonomik në policinë e Tiranës, po punojnë mbi evidentimin e qytetarëve dhe tregtarëve të tjerë të dëmtuar dhe mashtruar nga Fatjon Podri, ndërsa i fton ata të paraqiten për të depozituar kallzimin e tyre në mjediset e policisë së Tiranës.
Dosja penale e Fatjon Podrit mbi akuzën e mashtrimit i ka kaluar tanimë për ndjekje të mëtejshme prokurorisë së Tiranës.
mit/NOA
