Nis Raundi I Dyte I Negociatave Pd-Ps Për Hetimin E Zgjedhjeve
TIRANË, 21 Korrik/ATSH-Anila Struga/.- Kryetari i grupit parlamentar të Partisë Demokratike, Astrit Patozi dhe kryetari i grupit parlamentar të Partisë Socialiste, Gramoz Ruçi sapo kanë nisur takimin e dytë kokë më kokë në kryesinë e Kuvendit, në kuadër të negociatave për zgjidhjen e situatës politike në vend.
Takimi, që po zhvillohet pa praninë e mediave, pason rezolutën e Parlamentit Europian për Shqipërinë, e cila kërkon nisjen e dialogut rreth ngritjes së komisionit parlamentar, që do të hetojë zgjedhjet e 28 qershorit, një çështje kjo e shumëdebatuar, që po mban peng prej një viti bashkëpunimin mes dy partive kryesore.
Takimet mes të dy kryetarëve të Grupeve Parlamentare PD dhe PS, nisën më 14 Korrik 2010.
"Maxhoranca është e gatshme të pranojë çdo pretendim të opozitës në respektim të plotë të Kushtetutës dhe ligjeve të vendit", deklaroi një javë më parë kryetari i grupit parlamentar të Partisë Demokratike, Astrit Patozi, pas takimit dy orësh me homologun socialist, Gramoz Ruçi, në kuadër të negociatave për zgjidhjen e ngërçit politik në vend./a.gj/
