Tiranë, 21 Korrik, NOA - Unioni i Gazetarëve Shqiptarë, përmes një deklarate për shtyp, ka shprehur keqardhjen për ndërprerjen e botimit të një tjetër gazete të përditshme, disa vjeçare, asaj “Ballkan”, duke theksuar faktin se kjo është gazeta e tretë e përditshme që mbyllet në Shqipëri gjatë këtij viti, pas atyre të njohura “Tema” dhe “Korrieri”.
“UGSH është i shqetësuar për gjendjen e vështirësinë në shtim, me të cilën po përballet tregu i sotëm mediatik në vend, por sidomos me rëndesën në shtim të gjendjes financiare dhe pambrojtjen sociale me të cilën përballen aktualisht gazetarët profesionistë në vend”, thuhet në këtë deklaratë.
Duke shtuar se nga mbyllja e tre gazetave të përditshme, kanë humbur vendin e tyre të punës rreth 37 gazetarë, ndërkohë që pothuajse të gjithë mbeten ende të pashlyer për pagat e tyre mujore, për disa muaj rresht.
“Aktualisht, sipas informacionit të raportuar nga anëtarë të Unionit të Gazetarëve Shqiptarë, në 17 gazeta të përditshme vijojnë të ripërsëriten vonesat e pagave mujore për reporterët dhe stafet e tjera redaksionale. Kjo situatë e tillë, kritike paraqitet edhe në shumicën e mediave elektronike në vend”, shton deklarata.
Në fund, Unioni i Gazetarëve Shqiptarë shpreh shqetësimin në rritje për këtë situatë të vështirë financiare që ka mbërthyer tregun mediatik, duke cilësuar kjo gjendje ka vënë në vështirësi ekzistenciale një numër të madh reporterësh, redaktorësh dhe kategori të tjera profesionistësh në gazetarinë e vendit.
“Unioni i Gazetarëve Shqiptarë,duke njohur nga afër këtë gjendje dhe kushtet financiare që mbart tregu informal i punës në këtë treg, apelon për një reagim të menjëhershëm të institucioneve ligjore të punës dhe tregut, të Kuvendit dhe qeverisë së Shqipërisë, për të ndikuar ligjërisht, dhe vetëm ligjërisht, në ndaljen e kësaj situate përkeqësuese dhe në përkrahjen e komunitetit të gazetarëve, për të mos i shndërruar ata në individë socialë, pa punë, pa mbështetje sociale dhe në fatin e të braktisurve prej shtetit institucional”, përfundon deklarata në fjalë.
n.e/NOA
