Kuvend-Topalli: Ka Ikur Koha E Izolimit Të Shqipërisë, Jemi Në Kohën E Integrimit
TIRANË, 22 Korrik/ATSH/.- Kryetarja e Kuvendit, Jozefina Topalli, deklaroi sot në seancë plenare se, ka ikur koha e izolimit të Shqipërisë, sot është koha e globalizmit dhe integrimit për të.
Kryetarja Topalli replikoi ashpër me deputetët e opozitës, të cilët e akuzuan për udhëtimet e shpeshta të saj jashtë vendit.
"Për sa kohë do të jem deputete dhe kryetare e Kuvendit, nuk do të rresht as ditë e as natë, në çdo orë e çdo minutë dhe me sa forcë e mundësi të kem, unë do të komunikoj me çdo vend të Bashkimit Europian. Dhe ka qënë brenda një kohe rekord ratifikimi i MSA-së. Dhe në atë kohë ju (opozita) ishit me bilbila dhe sot mund të jeni me vuvuzela", iu përgjigj Topalli deputetëve të majtë.
"Në kohën e ratifikimit të Protokollit të NATO-s, vijoi ajo, ju vazhdonit të protestonit dhe unë shkoja vend më vend, ku kisha fuqi dhe e ratifikuam Protokollin. Dhe sot me sa forcë, fuqi e mundësi të kem, do të shkoj vend më vend për të mbrojtur pavarësinë e Kosovës. Ka ikur koha e izolimit të Shqipërisë, jemi në kohën globalizmit dhe integrimit dhe unë nuk do të rresht asnjë sekondë, por do të shkoj ku të mundem për heqjen e vizave për shqiptarët".
Kryetarja e Kuvendit tha se interesi i opozitës janë dietat dhe rrotat e makinave.
"Çirruni sa të doni ju për dietat e Jozefina Topallit, por unë do të shkoj ku të mundem për Shqipërinë dhe vendin tim. Ju jeni të mërzitur se secili prej jush çdo ditë shkon tek zyrat e administratës dhe thotë se pse nuk i japin një makinë dhe dieta, se pse nuk i ndërroni gomat e makinës. Ky ka qënë qëndrimi juaj dhe këtë transmetojani kryetarit tuaj", tha kryetarja Topalli duke iu drejtuar deputetëve të grupit parlamentar socialist./a.s//a.ke/
