Tiranë, 22 korrik, NOA – Debatet mes deputetëve të mazhorancës dhe opozitës ashpërsohen pas rinisjes së seancës së fundit të këtij sesioni parlamentar maratonë, ku në kuvend pritet të miratohen rreth 20 projektligje, mes tyre ai për SHISH-in.
Kryetari i Grupit Parlamentar të Partisë Socialiste, Gramoz Ruçi kërkoi menjëherë pas rinisjes së seancës që të hiqet nga rendi i ditës projektligji për SHISH-in.
Ruçi theksoi se duhet hedhur në votë heqja e këtij projektligji, për të cilin kuvendi vetë kish thënë më parë se nuk do të diskutohej, pas hamendimeve të opozitës se ai do të diskutohej në seancën e fundit të këtij sesioni, pra në 22 korrik.
Pas kësaj kërkese grupi parlamentar i socialistëve, është ngritur karriget dhe i janë afruar foltores së kuvendit në shenjë kundërshtimi ndaj diskutimit të projektligjit shumë të debatuar të SHISH-it.
Ruçi, rishtas i kërkoi kryetares së Parlamentit Jozefina Topalli që të hiqet nga seanca e sotme diskutimi, pasi nuk ka qenë në kalendar.
Por, kryeparlamentarja Topalli ka replikuar duke thënë se ky projektligj është në rend të ditës së sotme qysh para tre javësh.
Ruçi këmbënguli duke e quajtur “mashtruese”, kryetaren e Parlamentin, pasi sipas tij, relacioni për diskutimet e seancës së sotme ka mbërritur me këtë projektligj të shtuar vetëm mëngjesin e datës 22 korrik.
Debate të ashpra mes zonjës Topalli dhe kryetarit të grupit kuvendor të PS-së, Gramoz Ruçi vijuan vetëm për faktin se Ruçi dhe PS, kërkoi të hidhet në votë heqja e projektligjit të SHISH nga rendi i ditës, me akuzën se rendi i ditës është paraqitur dy ditë para, ndërsa kalendari ka dalë vetëm sot.
Ky ligj sikundër tha dhe Meta ende nuk është konsultuar me NATO-n, ndaj nuk mund të miratohet, pikërisht sepse është një ligj që ka të bëjnë me sigurinë kombëtare.
mit/NOA
