Flotilja - Okb Emëron Tre Ekspertët E Ngarkuar Me Hetimin E Pavarur
GJENEVË, 23 korrik /ATSH-AFP/ - Këshilli i të drejtave të njeriut të OKB-së emëroi sot tre ekspertët e ngarkuar me hetimin për sulmin izraelit kundër flotiljes së ndihmës në Gaza, në fund të majit, që ka shkaktuar nëntë të vdekur.
"Tre ekspertë do të marrin pjesë në misionin e pavarur ndërkombëtar për përcaktimin e fakteve dhe do të kenë për detyrë të hetojnë lidhur me shkeljet e të drejtës ndërkombëtare, përfshirë të drejtën ndërkombëtare humanitare dhe të drejtat e njeriut që rezultojnë nga sulmi izraelit kundër flotiljes së anijeve që transportonin ndihmë humanitare", njofton OKB-ja në një komunikatë.
Këshilli i të drejtave të njeriut vendosi më 2 qershor të vitit 2010 krijimin e një misioni të pavarur ndërkombëtar për parashtrimin e fakteve me qëllim shqyrtimin e sulmeve të rënda të ndërmarra nga forcat izraelite kundër autokolonës humanitare".
Më 31 maj, komandot e marinës izraelite kanë sulmuar tragetin turk Mai Marmara i konsideruar si trageti admiral i kësaj flotiljeje, gjatë të cilit u vranë nëntë pasagjerë turq.
Ekspertët e emëruar nga OKB-ja janë Karl Hudson-Phillips (nga Triniti dhe Tobago), gjykatës në Gjykatën Penale Ndërkombëtare nga viti 2003 deri në vitin 2007, Desmond de Silva (Mbretëria e Bashkuar), kryeprokuror i Gjykatës së Posaçme për Sierra Leonen në vitin 2005 dhe Mary Shanthi Dairiam (Malajzia), e grupit të punës për barazinë e gjinive në Programin e OKB-së për Zhvillimin.
/I.Pu.
