Kukës: Rritet Sipërfaqja E Gjelbëruar Në Qytet
KUKËS, 23 Korrik /ATSH-R.Hoxha/ - Gjatë këtij viti është rritur ndjeshëm sipërfaqja e gjelbër në bashkinë e Kukësit, bëjnë të ditur burime pranë saj.
Sipas kryetarit të bashksië Hasan Halilaj, gjelbërimi i planifikuar, me vende pushimi dhe kënde lojrash për fëmijët, i ka ndryshuar faqen qytetit verilindor.
Sipas tij, pozitiv është fakti se, janë mbjellë me pemë dekorative sipërfaqe që deri tani ishin problematike për banorët si pasojë e ndërtimeve pa leje.
Kukësi, me rreth 25 mijë banorë, ka një sipërfaqe të gjelbëruar me parqe e lulishte që arrin në 140 mijë metër katrorë, afërsisht 7 metër katrore për frymë.
"Synimi është që brenda dy viteve sipërfaqja për frymë e gjelbëruar të arrijë në afro 14 metër katrore për frymë", thotë Halilaj. Ky tregues ka qenë në fillim të viteve '90, por si rrjedhojë e zënies së sipërfaqeve të gjelbëruara nga ndërtimet pa kriter, ky tregues u reduktua në afro 5 metër katrore për frymë, ndërsa tashmë ka nisur rikthimi i këtyre sipërfaqeve në shërbim të komunitetit./ch/
