Kuvendi Miraton Disa Ligje Te Rendesishme
TIRANE, 22 Korrik/ATSH/. Anila Struga- Kuvendi i Shqipërisë miratoi sot vetëm me votat e maxhorancës (71 vota) një numër ligjesh të rëndësishme.
Pas një seance që zgjati mbi 12 orë, deputetet miratuan disa nga projektligjet e parashikuara në rendin e ditës si atë, "Për ratifikimin e marrëvëshjes ndërmjet Këshillit të Ministrave të Republikës së Shqipërisë dhe qeverisë së Republikës së Sllovenisë për shkëmbimin dhe mbrojtjen reciproke të informacionit të klasifikuar"; të ligjit "Për disa ndryshime dhe shtesa në ligjin "Për pajisjen e shtetasve me pasaportë për jashtë shtetit", të ligjit "Për disa ndryshime dhe shtesa në ligjin: "Për arsimin e lartë në Republikën e Shqipërisë", të disa ndryshimeve në ligjin "Për kthimin dhe kompensimin e pronës" si dhe Aktin Normativ "Për disa ndryshime në ligjin "Për prokurimin publik" të ndryshuar".
Me propozim të Komisionit për Ekonominë dhe Financat, Kuvendi shtyu votimin e projetkligjit "Për disa ndryshime në ligjin "Për auditimin e brendshëm në sektorin publik".
Gjithashtu, Kuvendi shtyu miratimin e projektligjeve të tjera të parashikuara në rendin e ditës. Seanca miratoi anëtarët e Bordit të "Institutit të Studimeve për Krimet dhe Pasojat e Komunizmit në Shqipëri", si dhe disa anëtarë të "Këshillit Kombëtar të Radio-Televizionit". /e.p./
