Elbasan: Bashkimi Europian, Financon Për Integrimin E Të Verbërve Në Shoqëri
ELBASAN, 26 korrik /ATSH-Miranda Sadiku/ - Një projekt i financuar nga Bashkimi Europian, për katër shoqatat e të verbërve në vendin tonë, synon rehabilitimin e tyre, me kushtet më të fundit bashkohore.
Kryetari i Shoqatës së të verbërve në qarkun e Elbasanit Ilir Hysa, e prezantoi këtë projekt para mediave lokale të hënën.
"Projekti konsiston në rehabilitimin e personave të verbër si nga ana psikologjike ashtu edhe aktiviteteve të ndryshme", tha kryetari i shoqatës së të verbërve Ilir Hysa. Sipas tij, projekti, i financuar nga BE, do të zgjasë 18 muaj
Drejtori i projektit për qarkun e Elbasanit Gazmend Karakyzja e vuri theksin tek aktivitetet e ndryshme që do të realizojnë të verbërit gjatë këtij 18 mujori.
"Të gjithë të verbërit e qarkut do të kenë mundësi që nëpërmjet pajisjeve tifloteknike, kompjuterave, librave audio, si dhe pajisjeve me skaner dore të lexojnë libra si dhe të njihen me të gjitha fushat e artit, shkencës, kulturës etj".
Në qarkun e Elbasanit zyrtarisht numërohen rreth 1500 të verbër./ch/
