Ministri Tafaj Në Kosovë, Viziton Universitetin E Prizrenit
TIRANË, 26 Korrik/ATSH/- Ministri i Arsimit dhe Shkencës, Myqerem Tafaj, vizitoi sot Universitetin e Prizrenit në prag të hapjes së tij.
Tafaj pati një takim të veçantë me Ministrin e Arsimit, Shkencës dhe Teknologjisë së Republikës së Kosovës, Enver Hoxhaj, ku uroi homologun e tij dhe qeverinë e Kosovës, për vendimin e GJND-së për pavarësinë e Kosovës.
Bashkëbiseduesit diskutuan për nje bashkëpunim më intensiv në fushën e arsimit dhe shkencës në bazë të marrëveshjes së përbashkët, të nënshkruar më 8 mars të këtij viti.
Ministri i Arsimit të Kosovës, Hoxhaj, falenderoi Ministrin Tafaj për mbështetjen që i ka dhënë dhe po vazhdon t'i japë arsimit të Kosovës.
Ai vlerësoi suksesin e reformave që Qeveria Berisha ka ndërmarrë në fushën e arsimit dhe nënvizoi bashkëpunimin e suksesshëm midis dy vendeve, qeverive dhe ministrive përkatëse.
"Marrëveshja me Shqipërinë është shumë e veçantë, tha Hoxhaj, dhe ne duam të marrim si model ligjin tuaj të Arsimit të Lartë. Kemi interesim të madh për përvojën e Shqipërisë edhe në hartimin e teksteve shkollore".
Nga ana e tij, ministri Tafaj shprehu vendosmërinë për të theksuar dhe intensifikuar bashkëpunimin dhe u ndal në hapësirat që lejon marrëveshja e përbashkët. Ai shtroi para kolegut kosovar sfidat e reformimit të sistemit arsimor në Republikën e Shqipërisë dhe mbështetjen e gjithanshme të Qeverisë Berisha për arsimin e standardeve europiane.
Më pas, Tafaj u takua edhe me përfaqësues të komunës së Prizrenit, ku biseduan për zhvillimet më të fundit në Kosovë dhe sidomos për ndihmën e dhënë nga qeveria shqiptare në hapjen e Universitetit të Prizrenit.
Ministrat e Arsimit dhe Shkencës vizituan edhe Universitetin e këtij qyteti, i cili pret studentët e parë më 1 tetor të këtij viti.
Në një konferencë të përbashkët shtypi, të dy ministrat theksuan rëndësinë dhe funksionalizimin e Universitetit të Prizrenit.
Ministri Tafaj, theksoi se "Qeveria Berisha e ka mirëpritur shumë themelimin e Universitetit të Prizrenit në këtë qytet historik dhe do ta mbështesë atë me të gjitha mundësitë, veçanërisht në nivel akademik. Rruga e Kombit, tha Tafaj, e bën shumë të lehtë ardhjen e pedagogëve në këtë Universitet."
Sipas tij, përvoja e themelimit të universiteteve në rajone të ndryshme të vendit në Shqipëri ka qënë shumë e suksesshme. "Besoj se kjo do të ndodhë edhe në Kosovë dhe Universiteti i Prizrenit për një kohë të shkurtër do të jetë i një cilësie të lakmueshme dhe konkuruese me të tjerët", tha Tafaj./e.gj//a.ke/
