Vlore: Mot Me Vranesira, Ulje E Metejshme E Temperaturave
VLORË, 26 korrik/ATSH-H.Koçi/.- Situata meteorologjike sot në gjirin detar të Vlorës parashikohet të jetë e paqëndrueshme. Moti do të jetë me vranësira të çregullta dhe reshje të përkohshme e lokale shirash, ndërkohë që vlerat e temperaturave do të shënojnë një rënie të mëtejshme krahasuar me një ditë më parë.
Kjo situatë meteorologjike është rrjedhojë e ndryshimit të regjimit të erërave që do të ndikojë gjithashtu edhe në rënien e vlerave të temperaturave. Ajo do të shoqërohet edhe me një keqësim të lehtë të kushteve të lundrimit, veçanërisht për mjetet e vogla, çka ka bërë peshkarexhat të mos dalin për peshkim.
Burime të Kapitenerisë së Portit bënë të ditur për ATSH-në se, sot era do të ketë drejtimin në kuadratin Perëndim-Veriperëndim, me shpejtësi nga 4-6 m/sek, deri në 8-10 m/sek në afërsi të bregut të detit. Temperaturat e ajrit do të arrijnë vlerat maksimale në 28-30 gradë celsius dhe ato minimale në 19-21 gradë celsius, ose respektivisht 2 gradë më ulët se një ditë më parë.
Valëzimi parashikohet të jetë 2-3 ballë brenda gjirit detar dhe 4-5 ballë në det të hapur. /a.ke/
