Pizë, 27 Korrik, NOA - Një arratisje spektakolare është cilësuar nga mediat italiane, ajo e dy të burgosuve shqiptarë, të cilët vuanin dënimin në burgun e Pizas në Itali.
Bëhet fjalë për Roland Dedjan 26-vjeç dhe Bledar Shehun, 27-vjeç, të gjendur në burg nën akuzat e vrasjes dhe vjedhjes, të cilët kanë mundur të largohen duke u varur në çarçafë nga dritaret e burgut dhe ndërsa kanë dalë në rrugë, i kanë rrëmbyer makinën tip Cherokee një gruaje duke fluturuar me shpejtësi.
Mësohet se deri tani, hetimet e policisë italiane rreth vendodhjes së tyre të re, nuk kanë pasur sukses dhe se makina e vjedhur e gruas, nuk është gjetur ende.
Por thuhet se patrullat policore kanë mbushur çdo rrugë të qytetit dhe madje çdo supermarket, pikë karburanti etj, duke aluduar se dy të burgosurit, ndoshta nuk kanë të holla me vete dhe mund të bëjnë krime të tjera në kërkim të parave të gatshme.
"Prej kohësh, i kemi denoncuar dobësitë serioze që paraqet burgu i Pizës, - është shprehur Donato Capece, sekretari i sindikatës së policisë së burgut, - por askush nuk ka treguar kujdes, duke e paguar këtë me çmimin e disa arrative kohët e fundit”.
Sipas tij, sistemi i alarmit në muret e qarkut të burgut të Pizës nuk është duke punuar, dhe mungesa e personelit të mjaftueshëm të burgut, nuk i lejon aktivitetet e mbikqyrjes përgjatë mureve të tij.
n.e/NOA
