Topi: Ambasadori Withers Kontribut Të Madh Në Forcimin E Komunikimit Dhe Miqësisë Me Shba-Në
- Gjatë një takimi me Ambasadorin e SHBA-së në Tiranë -
TIRANË, 27 Korrik/ATSH/.- Presidenti i Republikës Bamir Topi i shprehu sot ambasadorit amerikan ne Tiranë, John Withers, mirënjohjen e thellë në emër të shtetit shqiptar për punën e vyer dhe shërbimin e çmuar diplomatik, si përfaqësues i aleatit më të madh dhe partnerit më të rëndësishëm strategjik të Shqipërisë, gjate një takimi me Ambasadorin e SHBA-së i cili është në përfundim të mandatit të tij në vendin tonë.
Sipas një njoftimi nga zyra e shtypit te Presidencës , Kreu i Shtetit theksoi se z. Withers "do të mbetet i pazëvendësueshëm në kujtesën e popullit dhe institucioneve shqiptare për dashurinë, përkujdesjen dhe mënyrën e drejtpërdrejtë të të bërit diplomaci me një mendësi moderne, të shoqëruar dhe me kontributin e madh në përforcimin e urave të komunikimit dhe miqësisë tradicionale që lidh dy popujt dhe vendet tona."
Nga ana e tij, Ambasadori amerikan Withers e ka falenderuar Kreun e Shtetit shqiptar për ndihmesën dhe mbështetjen personale dhe institucionale.
Sipas njoftimit mësohet se, diplomati i lartë ka theksuar se po largohet nga vendi ynë me kujtimet më të mira për këtë periudhë më tepër se tre-vjeçare dhe me bindjen se asgjë nuk do ta ndalë popullin shqiptar që me vlerat, energjinë dhe vendosmërinë e tij të ndërtojë një Shqipëri të bazuar mbi vlerat universale të demokracisë, shtetit të së drejtës dhe rritjes së mirëqenies së gjithanshme./a.s/f.n/
