Tiranë, 28 korrik, NOA – Këshilli i Lartë i Drejtësisë do të zgjedhë anëtarët e rinj brenda dy javëve të para të shtatorit.
Këtë e vendoi sot mbledhja e thirrur nga Kryetarja e Gjykatës së Lartë, Shpresa Beçaj, ku merrte pjesë e dhe nënkryetari i KLD-së, Kreshnik Spahiu.
Në këtë takim, thuhet në njoftimin për shtyp të Gjykatës së Lartë, u vendos ngritja e një grupi pune, i cili do të hartojë projekt-rregulloren për funksionimin e Konferencës zgjedhore me qëllim zgjedhjen e anëtarëvë të rinj të KLD-së, brenda dy javëve të para të shtatorit.
Më pas kjo projekt-rregullore do t’i nënshtrohet procesit të shqyrtimit nga të gjithë gjyqtarët, në një takim të përbashkët, që do të organizohet në fund të muajit shtator.
Në tryezën e rrumbullakët konsultative, kryetarët e gjykatave të Republikës dhe përfaqësues të shoqatave të gjyqtarëve diskutuan për përpjekjet e vazhdueshme për të zgjidhur situatën e krijuar brenda pushtetit gjyqësor, lidhur me funksionimin e Konferencës Gjyqësore Kombëtare në kushtet e vakumit ligjor për rregullimin e saj.
Duke vlerësuar rolin e pazëvendësueshëm të këtij organi për mirëfunksionimin e pushtetit gjyqësor, në funksion të mbrojtjes së pavarësisë së pushtetit gjyqësor, sot përfaqësuesit e gjyqësorit, i thanë “po” njëzëri mbledhjes së Konferencës Gjyqësore Kombëtare edhe në mungesë të ligjit organik.
Konferenca Gjyqësore Kombëtare parashikohet të organizohet gjatë dy javëve të para të muajit nëntor.
mit/NOA
