Pakistan - Aksident Ajror - Gjenden Trupat E Të Paktën 100 Personave, Nuk Ka Ende Të Mbijetuar
ISLAMABAD, 28 korrik /ATSH-AFP/ - Trupat e më tepër se 100 personave u gjetën mes mbetjeve të avionit pakistanez të linjës që u rrëzua sot në mëngjes me 150 persona në bord pranë Islamabadit, por nuk ka ende gjurmë të të mbijetuarve, njoftoi AFP-në shefi i policisë së qytetit.
"Më tepër se 100 trupa janë gjetur. Nuk kemi gjetur ende të mbijetuar", i deklaroi AFP-së Bani Amin, duke shtuar se kërkimet vazhdojnë.
Pas aksidentit, qeveria federale e kryeministrit Jusuf Raza Gilani shpalli një ditë zie kombëtare duke shprehur hidhërimin për viktimat dhe Gilani shtyu për javën e ardhshme një mbledhje qeveritare të parashikuar për sot, bëri të ditur shërbimi i kryeministrit në një komunikatë.
/I.Pu.
