Durrës, 28 korrik, NOA – Bie në prangat e policisë së Portit të Durrësit një kosovar, i cili kërkonte të kalonte kufirin detar përdrejt Italisë me një vizë të falsifikuar sllovene.
Policia e Durrësit njo0ftoi se 25 vjeçari Faton Shabani nga Mitrovica, dhe banues në fshatin Vushtri të Kosovës, u arrestua dje në mëngjes në orën 09.00.
Sipas policisë, Faton Shabani në 26 korrik rreth orës 23:50, pak para mesnatës është kapur në flagrancë nga shërbimet e Policisë Kufitare të Portit të Durrësit pikërisht në Terminalin e Pasagjerëve.
Ai po tentonte të udhëtonte në mënyrë të kundraligjshme për në Itali, me një nga tragetet e linjës Durrës - Bari, duke përdorur për këtë udhëtim një pasaportë kosovare, në faqen 7, të së cilës ndodhej një vizë sllovene, që dyshohet të jetë e falsifikuar, pasi oficerët kishin vënë re ndërhyrje në afatin e vlefshmërisë së saj.
I arrestuari Faton Shabani po ndiqet penalisht nga prokuroria e Durrësit për falsifikim dokumentesh.
mit/NOA
