Berisha Takon Drejtorin E Naac, Avni Mustafaj
TIRANË, 30 Korrik/ATSH, A.Gegvataj /- Kryeministri Berisha priti sot në një takim, Drejtorin Ekzekutiv të Këshillit Kombëtar Amerikano-Shqiptar (NAAC), Avni Mustafaj.
Zyra e shtypit e qeverisë bëri të ditur se Berisha vlerësi në këtë takim kontributin dhe rolin thelbësor të NAAC-së, por edhe të gjithë diasporës shqiptare në SHBA, duke mbajtur gjallë shpirtin e shqiptarizmit si në të shkuarën, por edhe me rolin e saj në zhvillimet demokratik.
Gjatë bisedës, temë kryesore ishte opinioni i GJND-së për pavarësinë e Kosovës, ku kryeministri Berisha theksoi se "ky vendim përbën për të gjithë shqiptarët fitoren më të rëndësishme në historinë e tyre, shpërblimin më të madh dhe mirënjohjen më të thellë ndaj të gjithë atyre që me sakrificën e tyre sublime, me luftën dhe përpjekjet e tyre bënë të mundur pavarësinë e Kosovës".
Në këtë kontekst, Berisha shprehu vendosmërinë e qeverisë shqiptare për të dhënë gjithë kontributin e saj për një kapitull të ri në historinë e marrëdhënieve midis serbëve dhe shqiptarëve, mes Tiranës dhe Beogradit si dhe të ndihmojë, me aq sa ka mundësi, në marrëdhëniet midis Prishtinës dhe Beogradit.
Më tej, kreu i ekzekutivit e njohu drejtorin e NAAC dhe me reformat politike dhe ekonomike që ka ndërmarrë Shqipëria në kuadër të plotësimit të kritereve për liberalizimin e vizave dhe integrimin e vendit në BE.
Nga ana e tij, z. Mustafaj vlerësoi kontributin dhe përpjekjet e jashtëzakonshëm të qeverisë shqiptare në njohjen e pavarësisë së Kosovës. /k.sh/
