Tiranë, 30 korrik, NOA, Rajmonda Lajthia - Sikundër pritej, kjo verë ka ndikuar sadopak në forcimin e monedhës vendase, kundrejt valutave euro/dollarë.
Ky është një lajm i mirë, në këtë sezon veror, për të gjithë ata, që kërkojnë të blejnë euro, për të kaluar pushimet jashtë vendit dhe që duan të bëjnë llogaritë e shpenzimeve.
Në tregun valutor, një euro ka arritur në këto ditë vere në kufijtë e 135-136 lekëve, krahasuar me nivelin prej 139 të shënuar gjatë këtij fillim viti.
Sipas agjentëve valutorë, kjo situatë është sezonale dhe ka ardhur si pasojë e prurjeve të emigrantëve.
Sipas tyre, parashikohet që ky nivel kursi euro/lekë do të jetë edhe gjatë muajit gusht. Parashikimi i ekspertëve të ekonomisë është se kjo situatë nuk do të vazhdojë gjatë, pasi me largimin e emigrantëve, leku do të rinisë të zhvlerësohet.
Duke qenë se pjesa më e madhe e tregtisë së vendit bëhet nga shtetet fqinjë Greqi, Itali edhe kursi i këmbimit varet nga zhvillimet ekonomike të tyre.
Papunësia e emingrantëve shqiptarë në këto shtete bënë, që ata të sjellin më pak kursime në Shqipëri.
Por, ajo që vlen për tu theksuar është se edhe bankat e nivelit të dytë në Shqipëri këtë verë, nuk kanë reklamuar norma të favorshme interesi për depozitat, në mënyrë që të thithin sa më shume kursime nga emigrantët.
Por, ka ndodhur e kundërta.
Normat e depozitave kanë pësuar rënie, ndërsa të kredive rritje.
r.l/NOA
