Hagë, 2 gusht, NOA - Ish kryeministri i Kosovës, Ramush Haradinaj, i ka kërkuar sot Gjykatës së Hagës, që të lirohet përkohësisht deri në fillimin e procesit gjyqësor.
Në kërkesë e paraqitur nga avokatët e liderit të AAK-së, Haradinaj, shkruhet se “nëse lirohet, Haradinaj, nuk do të paraqesë rrezik për dëshmitarët dhe se nuk ekziston rreziku për ikjen e tij”.
Sipas avokatëve të Ramush Haradinaj, nuk ekziston asnjë dëshmi e rrezikimit të ndonjë dëshmitari si pasojë e lirimit të liderit të AAK-së, pas gjykimit të shkallës së parë dhe lirimit të tij, para katër vitesh.
Dhoma e Apelit e Tribunalit të Hagës për Krime të Luftës, vendosi në seancën e mbajtur më 21 korrik të këtij viti, një ditë para opinionit të dhënë nga Gjykata Ndërkombëtare e Drejtësisë, që procesi kundër tre të akuzuarëve për krime lufte, Ramush Haradinaj, Idriz Balaj dhe Lah Brahimit, të gjykohet pjesërisht.
mit/NOA
