Uashington, 2 Gusht, NOA - Presidenti amerikan, Barak Obama, pohoi sot se tërheqja e trupave amerikane nga Irak u do të nisë pas datës 31 gusht të këtij viti, ashtu siç në fakt ishte premtuar sipas një plani të hartuar nga Pentagoni.
Lajmi është bërë me dijeni nga vetë presidenti i Shteteve të Bashkuara të Amerikës, sipas të cilit lufta në Irak, do të përfundojë ashtu siç është premtuar dhe sipas orarit, më 31 gusht 2010.
“Pak pasi e mora zyrën, e pata shpallur strategjinë tonë të re për Irakun, për tranzicion deri në përgjegjësinë e plotë të irakianëve. E pata bërë të qartë se më 31 gusht të vitit 2010, do të përfundojë misioni luftarak i Shteteve të Bashkuara në Irak. Kjo është ajo që ne po e bëjmë, ashtu siç kemi premtuar dhe sipas orarit”, tha presidenti amerikan lidhur me një fakt të tillë.
Gjatë fjalimit në konventën kombëtare të Veteranëve Amerikanë me aftësi të kufizuara në Atlanta, ai theksoi se deri në fund të gushtit, më se 90 mijë ushtarë, meshkuj dhe femra, do të kthehen në shtëpi.
Ndërsa një forcë tranzicionale prej 50 mijë trupash, sipas tij, do të mbetet në Irak për stërvitjen e forcave të sigurisë, për ndërmarrjen e operacioneve kundër terrorizmit dhe për dhënien e sigurisë për përpjekjet civile të Shteteve të Bashkuara. Në fund, duke iu referuar luftës në Afganistan, presidenti Obama tha se Shtetet e Bashkuara po bëjnë progres, “përkundër sfidave të mëdha”.
n.e/NOA
