Shoqata E Bankave: Frenohet Rritja E Kredive Me Probleme
TIRANE, 2 Gusht /ATSH-E.Xhajanka/- Rritja e nivelit të kredive me probleme është frenuar në 11.7 për qind për të tretin muaj radhazi.
Ky fakt konstatohet nga Shoqata e Bankave. Sipas të dhënave të fundit, në fund të muajit prill niveli i kredive të pakthyera u vlerësua në 11.7 për qind, po aq sa edhe në dy muajt e mëparshëm. Ndërkohë, edhe për këtë periudhë bankat tona kanë rezultuar me fitim. Sipas të dhënave, fitimi progresiv i sistemit bankar për katër muajt e parë të këtij viti arriti në 2.3 miliardë lekë, me një rritje prej 46 për qind krahasuar me muajin mars.
Ky rezultat është dukshëm më i mirë krahasuar me të njëjtën periudhë të një viti më parë.
Frenimi i kredive të këqija është një lajm i mirë për klientët e bankave dhe ekonominë në përgjithësi, pasi përmirësimi i këtij treguesi ndikon në vendimin e sistemit bankar për të dhënë më shumë hua për individët dhe bizneset, duke mbështetur kështu financiarisht aktivitetin ekonomik të vendit./s.s./
