Tiranë, 3 Gusht, NOA – “Një deputet marionetë i mazhorancës pati kurajën të shkonte tek kopshti nr.26 i Tiranës dhe të deklaronte se ata që e kanë zaptuar, do të jenë pronarët e ardhshëm të kopshtit. Shikoni se ç’situatë mjerane, në çfarë gjendje është katandisur mazhoranca e sotme”.
Kjo është deklarata e bërë sot nga nënkryetari i grupit parlamentar socialist, Eduard Shalsi, sipas të cilit, mazhoranca përveçse është tërësisht pa një vizion, po aplikon edhe politika tejet të mbrapshta.
“Komuniteti i fëmijëve kërkon kopsht, kurse Sali Berisha ua rrëmben”, tha ai më tej.
Duke shpjeguar se cili është në fakt edhe vizioni i Partisë Socialiste për sistemimin e fëmijëve në kopshte.
“Vizioni ynë është ky: në radhë të parë, familjet që jetojnë në kushte shumë të vështira në këtë kopsht, të trajtohen në programet sociale. Pra, të strehohen në banesat sociale që Bashkia e Tiranës përfundon së ndërtuari shumë shpjet, jo larg atij kopshti”, tha ai.
Duke shtuar se së dyti, Bashkia e Tiranës kërkon që ky kopsht t’i nënshtrohet një rikonstruksioni të plotë për t’ua kthyer atyre që mezi e presin, fëmijëve të atij komuniteti.
“Kjo është alternativa jonë dhe kjo është diferenca jonë e jashtëzakonshme në vizione”, bëri me dije ai.
n.e/NOA
