Gjirokastër, 4 gusht, NOA – Përmes operacionit antikanabis i koduar “Boti” policia e Gjirokastrës ndaloi kalimin drejt Vlorës dhe sekuestroi sot në mëngjes, 5 kilogramë Mariuanë, një automjet tip Bot që transportonte çimento dhe prangosi drejtuesin e Botit.
Burime nga policia e Gjirokastrës thanë për agjencinë NOA se në kuadër të luftës kundër trafikut të lëndëve narkotike, sot në orën 07.00 të mëngjesit, specialistët e Seksionit Kundër Narkotikëve në Drejtorinë e Policisë së Qarkut Gjirokastër pas informacioneve në rrugë operative mësuan se një automjet Bot tip Volvo, që transporton çimento, mund të transportonte një sasi të konsidrueshme lënde narkotike nga Gjirokastra në drejtim të Vlorës.
E menjëhershme ishte ndërhyrja e policisë, e cila nisi operacionin e koduar ”Boti” në në aksin rrugor Gjirokastër –Memaliaj, duke bllokuar kalimin e automjetit.
Sipas policisë, automjeti tip Volvo ”Bot” me targa koka e botit GJ 5924 A, dhe Gj 03 99 B targa e botit , u konstatua duke lëvizur nga Gjirokastra në drejtim të Vlorës, ku është mbajtur nën vëzhgimin e agjentëve dhe Specialistëve Kundër Narkotikëve.
Bllokimi i Botit u bë në afërsi të qytetit Memaliaj, ku u ndalua edhe drejtuesi i tij.
Nga kontrolli i ushtruar në këtë automjet, policia në pjesën e sipërme të kokës së Botit , nga ana e jashtme gjeti një çantë të zezë, brenda të cilës kishte 4 pako me peshë të ndryshme, të mbushura me lëndë narkotike, gjithsej rreth 5 kilogramë lëndë narkotike të llojit Mariuanë.
Policia sekuestroi të gjithë lëndën e gjetur, automjetin Bot si dhe arrestoi drejtuesin e automjetit, 40 vjeçarin, Maksim Shahu, nga lagjia Manalat e qytetit Gjirokastër.
Sipas të dhënave Shahu, udhëtonte nga Gjirokastra për në Vlorë për të ngarkuar çimento për llogari të një firme betoni në Lazarat.
Tashmë Prokuroria e Gjirokastrës ka marrë në dorëzim materialin e hetimit dhe po ndjek penalisht të arrestuarin për prodhim dhe shitje të narkotikëve.
mit/NOA
